‘ಅಮೀಬಿಕ್‌ ಮೆನಿಂಗೊಎನ್ಸೆಫಲೈಟಿಸ್‌’ ಸೋಂಕು; ಶಬರಿಮಲೆ ಯಾತ್ರಾರ್ಥಿಗಳಿಗೆ ಸರ್ಕಾರದಿಂದ ಮಹತ್ವದ ಮಾಹಿತಿ

ಪ್ರತಿ ವರ್ಷದಂತೆ ಈ ಬಾರಿಯೂ ಮಂಡಲ ಪೂಜೆ ಮತ್ತು ಮಕರ ಜ್ಯೋತಿ ದರ್ಶನಕ್ಕಾಗಿ ಕರ್ನಾಟಕದಿಂದ ಲಕ್ಷಾಂತರ ಅಯ್ಯಪ್ಪ ಮಾಲಾಧಾರಿಗಳು ಶಬರಿಮಲೆಗೆ ತೆರಳುತ್ತಿದ್ದಾರೆ. ಭಕ್ತಿಭಾವದ ಈ ಯಾತ್ರೆಯ ನಡುವೆ, ಯಾತ್ರಾರ್ಥಿಗಳು ತಮ್ಮ ಆರೋಗ್ಯದ ಬಗ್ಗೆಯೂ ಕಾಳಜಿ ವಹಿಸುವುದು ಅತ್ಯಗತ್ಯ.
ಕೇರಳದ ಕೆಲವು ಭಾಗಗಳಲ್ಲಿ ‘ನೇಗ್ಲೇರಿಯಾ ಫೌಲೇರಿ’ (Naegleria fowleri) ಎಂಬ ಅಮೀಬಾದಿಂದ ಉಂಟಾಗುವ ‘ಅಮೀಬಿಕ್‌ ಮೆನಿಂಗೊಎನ್ಸೆಫಲೈಟಿಸ್‌’ (Amoebic Meningoencephalitis) ಸೋಂಕು ಕಂಡುಬಂದಿದೆ. ಈ ಹಿನ್ನೆಲೆಯಲ್ಲಿ ಕರ್ನಾಟಕ ಸರ್ಕಾರವು ಶಬರಿಮಲೆ ಯಾತ್ರಾರ್ಥಿಗಳಿಗೆ ಕೆಲವೊಂದು ಮುನ್ನೆಚ್ಚರಿಕೆ ಕ್ರಮಗಳನ್ನು ಪಾಲಿಸುವಂತೆ ಸೂಚಿಸಿದೆ.

ಏನಿದು ನೇಗ್ಲೇರಿಯಾ ಫೌಲೇರಿ?
ನೇಗ್ಲೇರಿಯಾ ಫೌಲೇರಿ ಎಂಬುದು ಕಣ್ಣಿಗೆ ಕಾಣದ ಒಂದು ಏಕಕೋಶೀಯ ಜೀವಿ (ಅಮೀಬಾ). ಇದು ಸ್ವತಂತ್ರವಾಗಿ ಬದುಕುವ ಸೂಕ್ಷ್ಮಜೀವಿಯಾಗಿದ್ದು, ಸಾಮಾನ್ಯವಾಗಿ ಬೆಚ್ಚಗಿನ ಸಿಹಿನೀರಿನ ಮೂಲಗಳಲ್ಲಿ ಕಂಡುಬರುತ್ತದೆ.

ಕೆರೆಗಳು ಮತ್ತು ಕೊಳಗಳು

ನಿಂತ ನೀರು (Stagnant water)

ಬೆಚ್ಚಗಿನ ನೀರಿನ ಬುಗ್ಗೆಗಳು

ಇದು ಹೇಗೆ ಹರಡುತ್ತದೆ ಮತ್ತು ಎಷ್ಟು ಅಪಾಯಕಾರಿ?
ಇದು ಅತ್ಯಂತ ಅಪಾಯಕಾರಿ ವಿಷಕಾರಿ ಸೂಕ್ಷ್ಮಜೀವಿಯಾಗಿದೆ. ಭಕ್ತರು ತೀರ್ಥ ಸ್ನಾನ ಮಾಡುವಾಗ ಅಥವಾ ಮುಖ ತೊಳೆಯುವಾಗ ಈ ಅಮೀಬಾ ಕಲುಷಿತ ನೀರಿನ ಮೂಲಕ ಮೂಗಿನ ಹೊಳ್ಳೆಗಳನ್ನು ಪ್ರವೇಶಿಸುತ್ತದೆ. ಅಲ್ಲಿಂದ ಅದು ನೇರವಾಗಿ ಮೆದುಳನ್ನು ತಲುಪಿ, ಮೆದುಳಿನ ಅಂಗಾಂಶಗಳನ್ನು ಹಾನಿಗೊಳಿಸುತ್ತದೆ. ಇದನ್ನೇ ‘ಅಮೀಬಿಕ್‌ ಮೆನಿಂಗೊಎನ್ಸೆಫಲೈಟಿಸ್‌’ ಎಂದು ಕರೆಯಲಾಗುತ್ತದೆ.

ಗಮನಿಸಿ: ಈ ಸೋಂಕು ಕಲುಷಿತ ನೀರನ್ನು ಕುಡಿಯುವುದರಿಂದ ಬರುವುದಿಲ್ಲ ಅಥವಾ ಒಬ್ಬ ವ್ಯಕ್ತಿಯಿಂದ ಇನ್ನೊಬ್ಬರಿಗೆ ಹರಡುವುದಿಲ್ಲ. ಇದು ಕೇವಲ ನೀರಿನ ಸಂಪರ್ಕ ಮೂಗಿನ ಮೂಲಕ ಆದಾಗ ಮಾತ್ರ ಸಂಭವಿಸುತ್ತದೆ.

ಯಾತ್ರಾರ್ಥಿಗಳು ಪಾಲಿಸಬೇಕಾದ ಸುರಕ್ಷತಾ ಕ್ರಮಗಳು
ಶಬರಿಮಲೆ ಯಾತ್ರೆಯಲ್ಲಿ ಪಂಪಾ ನದಿ ಅಥವಾ ಇತರೆ ಕೊಳಗಳಲ್ಲಿ ಸ್ನಾನ ಮಾಡುವುದು ಸಾಮಾನ್ಯ. ಈ ಸಮಯದಲ್ಲಿ ಈ ಕೆಳಗಿನ ಎಚ್ಚರಿಕೆಗಳನ್ನು ವಹಿಸಿ:

ಮೂಗಿನ ಕ್ಲಿಪ್ ಬಳಸಿ: ಕೆರೆ, ಕೊಳ ಅಥವಾ ನದಿಗಳಲ್ಲಿ ಸ್ನಾನ ಮಾಡುವಾಗ ಅಥವಾ ಮುಳುಗುವಾಗ ನೀರು ಮೂಗಿನೊಳಗೆ ಹೋಗದಂತೆ ತಡೆಯಲು ‘ನೋಸ್ ಕ್ಲಿಪ್‌’ಗಳನ್ನು (Nose Clips) ಬಳಸಿ.

ತಲೆ ಒದ್ದೆ ಮಾಡುವಾಗ ಎಚ್ಚರ: ನೀರಿನಲ್ಲಿ ತಲೆ ಮುಳುಗಿಸುವಾಗ ನಿಮ್ಮ ಮೂಗನ್ನು ಕೈಯಿಂದ ಗಟ್ಟಿಯಾಗಿ ಮುಚ್ಚಿಕೊಳ್ಳಿ.

ನಿಂತ ನೀರಿನ ಬಗ್ಗೆ ಎಚ್ಚರ: ಸಾಧ್ಯವಾದಷ್ಟು ಹೆಚ್ಚು ದಿನ ಒಂದೇ ಕಡೆ ನಿಂತಿರುವ ಅಥವಾ ಕಲುಷಿತವಾಗಿರಬಹುದಾದ ನೀರಿನಲ್ಲಿ ಸ್ನಾನ ಮಾಡುವುದನ್ನು ಅಥವಾ ಮುಖ ತೊಳೆಯುವುದನ್ನು ತಪ್ಪಿಸಿ.

ಇದನ್ನೂ ಓದಿ: 10th ಪಾಸಾದವರಿಗೆ ಇಂಟಲಿಜೆನ್ಸ್‌ ಬ್ಯೂರೋದಲ್ಲಿ ಉದ್ಯೋಗಾವಕಾಶ; ಕೇಂದ್ರ ಸರ್ಕಾರದ ಉದ್ಯೋಗ ಬಯಸುವರಿಗೆ ಉತ್ತಮ ಅವಕಾಶ

ಲಕ್ಷಣಗಳು ಕಂಡುಬಂದರೆ ಏನು ಮಾಡಬೇಕು?
ಕಲುಷಿತ ನೀರಿನ ಸಂಪರ್ಕಕ್ಕೆ ಬಂದ 1 ರಿಂದ 7 ದಿನಗಳ ಒಳಗೆ ಈ ಸೋಂಕಿನ ಲಕ್ಷಣಗಳು ಕಾಣಿಸಿಕೊಳ್ಳಬಹುದು.

ತೀವ್ರವಾದ ಜ್ವರ

ತಡೆಯಲಾರದ ತಲೆನೋವು

ವಾಂತಿ ಮಾಡುವುದು

ಕುತ್ತಿಗೆ ಬಿಗಿಯುವುದು (Stiff Neck)

ಗೊಂದಲ ಅಥವಾ ಮಾನಸಿಕ ಸ್ಥಿತಿಯಲ್ಲಿ ಏರುಪೇರು

ವ್ಯಕ್ತಿಯ ನಡವಳಿಕೆಯಲ್ಲಿ ಅಸ್ವಸ್ಥತೆ

ಮೇಲಿನ ಯಾವುದೇ ಲಕ್ಷಣಗಳು ಯಾತ್ರೆಯಲ್ಲಿದ್ದಾಗ ಅಥವಾ ಯಾತ್ರೆಯಿಂದ ಮರಳಿದ ನಂತರ ಕಂಡುಬಂದರೆ, ತಕ್ಷಣವೇ ಹತ್ತಿರದ ಆಸ್ಪತ್ರೆಗೆ ಭೇಟಿ ನೀಡಿ ವೈದ್ಯರ ಸಲಹೆ ಪಡೆಯಿರಿ.