ಬಹುನಿರೀಕ್ಷಿತ ರಾಜಮೌಳಿ–ಮಹೇಶ್ ಬಾಬು ಸಿನಿಮಾಗೆ ‘ವಾರಣಾಸಿ’ ಶೀರ್ಷಿಕೆ ಘೋಷಣೆ

ಭಾರತೀಯ ಚಿತ್ರರಂಗದ ಹೆಮ್ಮೆಯ ನಿರ್ದೇಶಕ ಎಸ್.ಎಸ್. ರಾಜಮೌಳಿ ಮತ್ತು ಸೂಪರ್‌ಸ್ಟಾರ್ ಮಹೇಶ್ ಬಾಬು ಅವರ ಕಾಂಬಿನೇಷನ್‌ನಲ್ಲಿ ತಯಾರಾಗುತ್ತಿರುವ ಬಹುನಿರೀಕ್ಷಿತ ಚಿತ್ರಕ್ಕೆ ಅಧಿಕೃತವಾಗಿ ‘ವಾರಣಾಸಿ’ ಎಂದು ಹೆಸರಿಡಲಾಗಿದೆ. ‘ಗ್ಲೋಬ್ ಟ್ರೋಟರ್’ (GlobeTrotter) ಎಂದು ತಾತ್ಕಾಲಿಕವಾಗಿ ಕರೆಯಲಾಗುತ್ತಿದ್ದ ಈ ಮಹತ್ವದ ಪ್ರಾಜೆಕ್ಟ್‌ನ ಶೀರ್ಷಿಕೆ ಬಹಿರಂಗಗೊಂಡಿದ್ದು, ಅಭಿಮಾನಿಗಳಲ್ಲಿ ಸಂಚಲನ ಮೂಡಿಸಿದೆ.

‘ರುದ್ರ’ನ ಅವತಾರದಲ್ಲಿ ಮಹೇಶ್ ಬಾಬು
ಹೈದರಾಬಾದ್‌ನಲ್ಲಿ ನಡೆದ ಅದ್ದೂರಿ ‘ಗ್ಲೋಬ್ ಟ್ರೋಟರ್’ ಸಮಾರಂಭದಲ್ಲಿ, ಚಿತ್ರದ ಶೀರ್ಷಿಕೆಯೊಂದಿಗೆ ಮಹೇಶ್ ಬಾಬು ಅವರ First Look ಗ್ಲಿಂಪ್ಸ್ ಅನ್ನು ಸಹ ಬಿಡುಗಡೆ ಮಾಡಲಾಯಿತು. ಈ ಗ್ಲಿಂಪ್ಸ್‌ನಲ್ಲಿ ಮಹೇಶ್ ಬಾಬು ಅವರು, ರಕ್ತಸಿಕ್ತ ಮೈ, ಉದ್ದನೆಯ ಗಡ್ಡ ಮತ್ತು ತ್ರಿಶೂಲವನ್ನು ಹಿಡಿದು ಭೋರ್ಗರೆಯುತ್ತಿರುವ ನಂದಿಯ ಮೇಲೆ ಸವಾರಿ ಮಾಡುತ್ತಿರುವ ‘ರುದ್ರ’ನ ಉಗ್ರ ಅವತಾರದಲ್ಲಿ ಕಾಣಿಸಿಕೊಂಡಿದ್ದಾರೆ. ಹಿನ್ನೆಲೆಯಲ್ಲಿ ಪ್ರಾಚೀನ ದೇವಾಲಯಗಳು ಮತ್ತು ‘ವಾರಣಾಸಿ’ ಶೀರ್ಷಿಕೆ ಮೂಡಿಬಂದಿದೆ.

ನಿರ್ದೇಶಕ ರಾಜಮೌಳಿ ಅವರು ತಮ್ಮ ಸಾಮಾಜಿಕ ಜಾಲತಾಣದಲ್ಲಿ ಈ ಪೋಸ್ಟರ್ ಅನ್ನು ಹಂಚಿಕೊಂಡು, “ಮಹೇಶ್ ಬಾಬು ಆಸ್ ರುದ್ರ ಇನ್ #VARANASI” ಎಂದು ಬರೆದುಕೊಂಡಿದ್ದಾರೆ.

ಸಾಹಸಮಯ ಕಥೆ ಮತ್ತು ಪೌರಾಣಿಕ ಸ್ಪರ್ಶ
‘ಬಾಹುಬಲಿ’ ಮತ್ತು ‘ಆರ್‌ಆರ್‌ಆರ್’ ನಂತರ ರಾಜಮೌಳಿ ಅವರ ಈ ಮುಂದಿನ ಚಿತ್ರದ ಮೇಲೆ ಇಡೀ ವಿಶ್ವದ ಸಿನಿಪ್ರಿಯರ ಕಣ್ಣಿದೆ. ‘ವಾರಣಾಸಿ’ ಚಿತ್ರವು ಒಂದು ರೋಮಾಂಚಕಾರಿ ಸಾಹಸ (Forest Adventure) ಕಥಾಹಂದರವನ್ನು ಹೊಂದಿದೆ ಎಂದು ತಿಳಿದುಬಂದಿದೆ. ಹಿಂದೂಗಳಿಗೆ ಪವಿತ್ರ ಕ್ಷೇತ್ರವಾದ ಕಾಶಿಯ (ವಾರಣಾಸಿ) ಹಿನ್ನೆಲೆಯಲ್ಲಿ ಕಥೆ ಪ್ರಾರಂಭವಾಗಿ, ನಂತರ ಆಫ್ರಿಕಾ, ಉತ್ತರ ಅಮೇರಿಕಾ, ದಕ್ಷಿಣ ಅಮೆರಿಕಾ ಸೇರಿದಂತೆ ಹಲವು ಅಂತರರಾಷ್ಟ್ರೀಯ ಸ್ಥಳಗಳಿಗೆ ಪಯಣಿಸಲಿದೆ. ಚಿತ್ರದ ಟೀಸರ್‌ನಲ್ಲಿ ಕಾಣಿಸಿದ #GlobeTrotter ಮತ್ತು #TimeTrotter ಹ್ಯಾಶ್‌ಟ್ಯಾಗ್‌ಗಳು ಕಥೆಯಲ್ಲಿ ಕಾಲಪ್ರಯಾಣದ (Time Travel) ಅಂಶಗಳಿರಬಹುದು ಎಂಬ ಕುತೂಹಲವನ್ನು ಹುಟ್ಟುಹಾಕಿವೆ.

IMAX ನಲ್ಲಿ ನಿರ್ಮಾಣ ತೆಲುಗು ಚಿತ್ರರಂಗಕ್ಕೆ ನಾವು ಹೊಸ ತಂತ್ರಜ್ಞಾನವಾದ “ಪ್ರಿಮಿಯಂ ಲಾರ್ಜ್ ಸ್ಕೇಲ್ ಫಾರ್ಮ್ಯಾಟ್ IMAX” ಅನ್ನು ಪರಿಚಯಿಸುತ್ತಿದ್ದೇವೆ. ಸಾಮಾನ್ಯವಾಗಿ, ನಾವು ಸಾಮಾನ್ಯ ಕ್ಯಾಮರಾದಲ್ಲಿ ಚಿತ್ರೀಕರಣ ಮಾಡಿ ಅದನ್ನು IMAX ಫಾರ್ಮ್ಯಾಟ್‌ಗೆ ಪರಿವರ್ತಿಸುತ್ತೇವೆ. ‘ಬಾಹುಬಲಿ’ ಮತ್ತು ‘ಆರ್‌ಆರ್‌ಆರ್‌’ ನಂತಹ ಚಿತ್ರಗಳು ಈ ರೀತಿ IMAX ನಲ್ಲಿ ಪ್ರದರ್ಶನಗೊಂಡಿದೆ. ಆದರೆ, ‘ವಾರಣಾಸಿ’ ಚಿತ್ರವು IMAX ಗೆ ಪೂರಕವಾದ ಸಂಪೂರ್ಣ ಪರದೆಯ (Full Screen) ಫಾರ್ಮ್ಯಾಟ್‌ನಲ್ಲಿ ನಿರ್ಮಾಣಗೊಳ್ಳಲಿದೆ. ಎಂದು ನಿರ್ದೇಶಕ ರಾಜಮೌಳಿ ಹೇಳಿದರು.

ಈ ಚಿತ್ರದಲ್ಲಿ ಮಹೇಶ್ ಬಾಬು ಅವರೊಂದಿಗೆ ಜಾಗತಿಕ ತಾರೆ ಪ್ರಿಯಾಂಕಾ ಚೋಪ್ರಾ (ಮಂದಾಕಿನಿ ಪಾತ್ರದಲ್ಲಿ) ಮತ್ತು ಮಲಯಾಳಂ ನಟ ಪೃಥ್ವಿರಾಜ್ ಸುಕುಮಾರನ್ (ಕುಂಭ ಎಂಬ ವಿಲನ್ ಪಾತ್ರದಲ್ಲಿ) ಪ್ರಮುಖ ಪಾತ್ರಗಳಲ್ಲಿ ನಟಿಸುತ್ತಿದ್ದಾರೆ. ಚಿತ್ರಕ್ಕೆ ಎಂ.ಎಂ. ಕೀರವಾಣಿ ಸಂಗೀತ ನೀಡುತ್ತಿದ್ದು, 2027ರ ಬೇಸಿಗೆಯಲ್ಲಿ ಚಿತ್ರ ಬಿಡುಗಡೆಯಾಗುವ ಸಾಧ್ಯತೆ ಇದೆ.

ಈ ಭವ್ಯವಾದ ಶೀರ್ಷಿಕೆ ಘೋಷಣೆಯು ಮಹೇಶ್ ಬಾಬು ಅಭಿಮಾನಿಗಳಿಗೆ ಹಬ್ಬದ ವಾತಾವರಣ ಸೃಷ್ಟಿಸಿದೆ. ಭಾರತೀಯ ಸಂಸ್ಕೃತಿ ಮತ್ತು ಸಾಹಸಮಯ ಕಥೆಯನ್ನು ಜಾಗತಿಕ ವೇದಿಕೆಯಲ್ಲಿ ಪ್ರಸ್ತುತಪಡಿಸಲು ರಾಜಮೌಳಿ ಸಜ್ಜಾಗಿದ್ದು, ‘ವಾರಣಾಸಿ’ ಸಿನಿಮಾ ವಿಶ್ವ ಸಿನಿಪ್ರಿಯರ ನಿರೀಕ್ಷೆಯನ್ನು ಹೆಚ್ಚಿಸಿದೆ.