ಸಾಮಾಜಿಕ ಜಾಲತಾಣಗಳಲ್ಲಿ ಪ್ರತಿದಿನ ಸಾವಿರಾರು ವಿಡಿಯೋಗಳು ಹರಿದಾಡುತ್ತವೆ. ಅವುಗಳಲ್ಲಿ ಕೆಲವು ನಮ್ಮ ಮುಖದಲ್ಲಿ ನಗು ತರಿಸಿದರೆ, ಇನ್ನು ಕೆಲವು ಮನುಷ್ಯತ್ವವೇ ಸತ್ತೋಗಿದೆಯಾ ಎಂಬ ಪ್ರಶ್ನೆಯನ್ನು ಹುಟ್ಟುಹಾಕುತ್ತವೆ. ಇದೀಗ ಅಂತಹದ್ದೇ ಒಂದು ಕರುಳು ಹಿಂಡುವ ವಿಡಿಯೋ ಇಂಟರ್ನೆಟ್ನಲ್ಲಿ ವೈರಲ್ ಆಗಿದ್ದು, ನೆಟ್ಟಿಗರ ತೀವ್ರ ಆಕ್ರೋಶಕ್ಕೆ ಕಾರಣವಾಗಿದೆ.
ಘಟನೆಯೇನು?
ವೈರಲ್ ಆಗಿರುವ ಈ ವಿಡಿಯೋದಲ್ಲಿ, ಬಸ್ನ ಕಿಟಕಿ ಬಳಿ ಕುಳಿತಿದ್ದ ಬಡ ವ್ಯಕ್ತಿಯೊಬ್ಬರು ತಮ್ಮ ಹಸಿವು ನೀಗಿಸಿಕೊಳ್ಳಲು ಹೊರಗಿದ್ದ ವ್ಯಾಪಾರಿಯೊಬ್ಬನಿಗೆ ಆಹಾರಕ್ಕಾಗಿ ಹಣ ನೀಡುತ್ತಾರೆ. ಆದರೆ, ಹಣ ಪಡೆದುಕೊಂಡ ಆ ವ್ಯಾಪಾರಿ ಆಹಾರವನ್ನು ಕೊಡಲು ಮೀನಮೇಷ ಎಣಿಸುತ್ತಾನೆ. ಅಷ್ಟರಲ್ಲಿ ಬಸ್ ಮುಂದಕ್ಕೆ ಚಲಿಸಲು ಪ್ರಾರಂಭಿಸುತ್ತದೆ. ಬಸ್ ಹೊರಟ ತಕ್ಷಣ ಆಹಾರವನ್ನು ಆ ಬಡವನ ಕೈಗೆ ನೀಡುವ ಬದಲು, ಆ ವ್ಯಾಪಾರಿ ಉದ್ದೇಶಪೂರ್ವಕವಾಗಿಯೇ ಅದನ್ನು ತನ್ನ ಬಳಿಯೇ ಉಳಿಸಿಕೊಳ್ಳುತ್ತಾನೆ.
ಮಾನವೀಯತೆ ಮರೆತ ವ್ಯಾಪಾರಿಯ ಕ್ರೂರ ನಗು
ಬಸ್ ಮುಂದೆ ಸಾಗುತ್ತಿದ್ದಂತೆ, ತಾನು ನೀಡಿದ ಹಣವೂ ಹೋಯಿತು, ತಿನ್ನಲು ಆಹಾರವೂ ಸಿಗಲಿಲ್ಲ ಎಂಬ ಅಸಹಾಯಕತೆಯಲ್ಲಿ ಆ ಬಡ ವ್ಯಕ್ತಿ ಕಿಟಕಿಯಿಂದ ನೋಡುತ್ತಾ ದೂರಾಗುತ್ತಾರೆ. ಆದರೆ, ಇತ್ತ ಆ ವ್ಯಾಪಾರಿ ತಾನೇನೋ ದೊಡ್ಡ ಸಾಧನೆ ಮಾಡಿದವನಂತೆ, ದೊಡ್ಡ ಯುದ್ಧವನ್ನೇ ಗೆದ್ದವನಂತೆ ಬಸ್ನತ್ತ ನೋಡಿ ನಿರ್ಲಜ್ಜವಾಗಿ ನಗುತ್ತಾ ನಿಂತಿರುತ್ತಾನೆ. ಬಡವನೊಬ್ಬನಿಗೆ ವಂಚಿಸಿದ ಖುಷಿಯಲ್ಲಿ ಆತನ ಮುಖದಲ್ಲಿ ಮೂಡಿದ ಆ ಕ್ರೂರ ನಗು ವಿಡಿಯೋ ನೋಡುವ ಪ್ರತಿಯೊಬ್ಬರ ರಕ್ತ ಕುದಿಯುವಂತೆ ಮಾಡುತ್ತದೆ.
ಭುಗಿಲೆದ್ದ ನೆಟ್ಟಿಗರ ಆಕ್ರೋಶ
ಎಕ್ಸ್ (ಹಿಂದಿನ ಟ್ವಿಟರ್) ಸೇರಿದಂತೆ ಹಲವು ಸಾಮಾಜಿಕ ಜಾಲತಾಣಗಳಲ್ಲಿ ಈ ವಿಡಿಯೋ ವ್ಯಾಪಕವಾಗಿ ಹಂಚಿಕೊಳ್ಳಲಾಗುತ್ತಿದ್ದು, ಲಕ್ಷಾಂತರ ವೀಕ್ಷಣೆ ಪಡೆದುಕೊಂಡಿದೆ. ವೀಡಿಯೊ ನೋಡಿದ ಪ್ರತಿಯೊಬ್ಬರೂ ವ್ಯಾಪಾರಿಯ ಅಮಾನವೀಯ ವರ್ತನೆಗೆ ಹಿಡಿಶಾಪ ಹಾಕುತ್ತಿದ್ದಾರೆ.
“ಬಡವರ ಹಸಿವಿನ ಜೊತೆ ಆಟವಾಡಿ, ಅವರ ಹೊಟ್ಟೆ ಮೇಲೆ ಹೊಡೆದು ಇವನು ಹೇಗೆ ಉದ್ದಾರ ಆಗುತ್ತಾನೆ?”, “ಇಂತಹ ಕೃತ್ಯವೆಸಗಿದ ಈತನಿಗೆ ತಕ್ಕ ಶಾಸ್ತಿಯಾಗಬೇಕು”, “ಮನುಷ್ಯತ್ವ ಅನ್ನೋದೇ ಉಳಿದಿಲ್ಲ” ಎಂದು ನೆಟ್ಟಿಗರು ಕಮೆಂಟ್ಗಳ ಮೂಲಕ ತಮ್ಮ ಕೋಪವನ್ನು ಹೊರಹಾಕುತ್ತಿದ್ದಾರೆ.
ಕರುಣೆ, ದಯೆ ಎಂಬುದು ಕಣ್ಮರೆಯಾಗುತ್ತಿರುವ ಈ ಕಾಲದಲ್ಲಿ ಇಂತಹ ಘಟನೆಗಳು ಸಮಾಜದ ಕರಾಳ ಮುಖವನ್ನು ಅನಾವರಣಗೊಳಿಸುತ್ತವೆ. ಕೆಲವೇ ಕೆಲವು ರೂಪಾಯಿಗಳಿಗಾಗಿ ಬಡವನೊಬ್ಬನಿಗೆ ಮೋಸ ಮಾಡಿದ ಆ ವ್ಯಾಪಾರಿಯ ಕೃತ್ಯಕ್ಕೆ ಎಲ್ಲೆಡೆ ತೀವ್ರ ಖಂಡನೆ ವ್ಯಕ್ತವಾಗಿದೆ.