ಕೆ.ಪಿ. ಪೂರ್ಣಚಂದ್ರ ತೇಜಸ್ವಿ ಅವರ ಜನಪ್ರಿಯ ಕಾದಂಬರಿ ಜುಗಾರಿ ಕ್ರಾಸ್ ಅಂತಿಮವಾಗಿ ಸಿನಿಮಾವಾಗಿ ತೆರೆಯ ಮೇಲೆ ಬರಲಿದೆ.
ಈ ಬಹುನಿರೀಕ್ಷಿತ ಚಿತ್ರವನ್ನು ನಿರ್ದೇಶಕ ಗುರುದತ್ತ ಗಾಣಿಗ ನಿರ್ದೇಶಿಸುತ್ತಿದ್ದು, ಪ್ರಮುಖ ಪಾತ್ರದಲ್ಲಿ ರಾಜ್ ಬಿ. ಶೆಟ್ಟಿ ನಟಿಸಲಿದ್ದಾರೆ.
ಅಂಬಿ ನಿಂಗೆ ವಯಸ್ಸಾಯ್ತೋ ಚಿತ್ರದ ಮೂಲಕ ಚಿತ್ರರಂಗಕ್ಕೆ ಪಾದಾರ್ಪಣೆ ಮಾಡಿದ ಗುರುದತ್ತ, ಈಗ ಕರಾವಳಿ ಚಿತ್ರದ ಬಿಡುಗಡೆಗೆ ಸಿದ್ಧತೆ ನಡೆಸುತ್ತಿದ್ದಾರೆ. ಜುಗಾರಿ ಕ್ರಾಸ್ ಕಾದಂಬರಿಯ ಚಿತ್ರ ರೂಪಾಂತರದ ಟೈಟಲ್ ಪ್ರೋಮೊ ಯೂಟ್ಯೂಬ್ ನಲ್ಲಿ ಬಿಡುಗಡೆಗೊಂಡು ಕನ್ನಡ ಸಿನಿಮಾ ಮತ್ತು ಸಾಹಿತ್ಯಾಸಕ್ತರಲ್ಲಿ ಭಾರಿ ಕುತೂಹಲವನ್ನು ಹುಟ್ಟುಹಾಕಿದೆ.
1980ರಲ್ಲಿ ಪ್ರಕಟವಾದ “ಜುಗಾರಿ ಕ್ರಾಸ್” ಕಾದಂಬರಿಯು ಕನ್ನಡ ಸಾಹಿತ್ಯದಲ್ಲಿ ಒಂದು ಮೈಲಿಗಲ್ಲಾಗಿದೆ. ಪಶ್ಚಿಮ ಘಟ್ಟದ ತಪ್ಪಲಿನಲ್ಲಿ ನಡೆಯುವ ಈ ಕಥೆಯು ರೈತ ದಂಪತಿಗಳ ಜೀವನದ ಸುತ್ತ ಸುತ್ತುತ್ತದೆ. ವನ್ಯಜೀವಿ ಕಳ್ಳಸಾಗಣಿಕೆ, ಕಾನೂನುಬಾಹಿರ ವ್ಯಾಪಾರ ಮತ್ತು ಅಪಾಯಕಾರಿ ಒಡನಾಟಗಳ ಜಾಲದಲ್ಲಿ ಸಿಕ್ಕಿಕೊಳ್ಳುವ ಈ ಕಥೆ, ಸಸ್ಪೆನ್ಸ್, ರೋಮಾಂಚನ ಮತ್ತು ಪರಿಸರ ಸಂದೇಶವನ್ನು ಸಮರ್ಥವಾಗಿ ಹೇಳಿದೆ. ತೇಜಸ್ವಿಯವರ ಸಾಹಿತ್ಯಯು ಮಲೆನಾಡಿನ ಸೌಂದರ್ಯವನ್ನು ಜೊತೆಗೆ ಮಾನವನ ದುರಾಸೆಯ ಛಾಯೆಯನ್ನು ಚಿತ್ರಿಸುವಲ್ಲಿ ಯಶಸ್ವಿಯಾಗಿದೆ.
ಕಳೆದ ಕೆಲವು ವರುಷಗಳಿಂದ ಈ ಕಾದಂಬರಿಯನ್ನು ಚಿತ್ರರೂಪಕ್ಕೆ ತರುವ ಪ್ರಯತ್ನಗಳು ನಡೆದಿವೆ. ಆದರೆ, ಕಾದಂಬರಿಯ ಸಂಕೀರ್ಣ ಕಥಾಹಂದರ, ತಿರುವುಗಳು ಮತ್ತು ಪರಿಸರ ಕಾಳಜಿಯನ್ನು ಚಿತ್ರರಂಗಕ್ಕೆ ತರುವುದು ಸವಾಲಿನ ಕೆಲಸವಾಗಿತ್ತು. ಹಿಂದಿನ ಕೆಲವು ಪ್ರಯತ್ನಗಳು ಆರಂಭಿಕ ಹಂತದಲ್ಲೇ ನಿಂತುಹೋಗಿದ್ದವು. ಆದರೆ ನಿರ್ದೇಶಕ ಗುರುದತ್ತ ಗಾಣಿಗ ಮತ್ತು ರಾಜ್ ಬಿ. ಶೆಟ್ಟಿ ಈ ಕನಸನ್ನು ನನಸಾಗಿಸುವ ತಯಾರಿಯಲ್ಲಿದ್ದಾರೆ.
ಗುರುದತ್ತ ಗಾಣಿಗ ಅಂಬಿ ನಿಂಗೆ ವಯಸ್ಸಾಯ್ತೋ ಚಿತ್ರದ ಮೂಲಕ ಕನ್ನಡ ಚಿತ್ರರಂಗದಲ್ಲಿ ಗಮನ ಸೆಳೆದವರು. ಈಗ ಕರಾವಳಿ ಚಿತ್ರದ ಬಿಡುಗಡೆಗೆ ಸಿದ್ಧರಾಗಿರುವ ಗುರುದತ್ತ, ಈ ಶ್ರೇಷ್ಠಕೃತಿಯನ್ನು ಸಿನಿಮಾವಾಗಿಸುವ ತಮ್ಮ ಮಹತ್ವಾಕಾಂಕ್ಷೆಯ ಯೋಜನೆಯಾಗಿ ಆಯ್ಕೆ ಮಾಡಿಕೊಂಡಿದ್ದಾರೆ. ಈ ಕಥೆಯ ಸಿನಿಮಾರೂಪಕ್ಕೆ ತಮ್ಮದೇ ಆದ ದೃಷ್ಟಿಕೋನವನ್ನು ತರುವ ಯತ್ನದಲ್ಲಿದ್ದಾರೆ. ಗುರುದತ್ತ ಗಾಣಿಗ ಫಿಲ್ಮ್ಸ್ ಮತ್ತು ಸಪ್ತಗಿರಿ ಎಂಟರ್ಟೈನ್ಮೆಂಟ್ನಡಿ ಈ ಚಿತ್ರವನ್ನು ನಿರ್ಮಿಸಲಾಗುತ್ತಿದೆ. ರಾಜ್ ಬಿ. ಶೆಟ್ಟಿ ʼಸು ಫ್ರಂ ಸೋʼ ಚಿತ್ರದ ಯಶಸ್ಸಿನ ನಂತರ, ಕನ್ನಡ ಚಿತ್ರರಂಗದಲ್ಲಿ ಒಂದು ದೊಡ್ಡ ಹೆಸರಾಗಿದ್ದಾರೆ. ಜುಗಾರಿ ಕ್ರಾಸ್ ನ ಪಾತ್ರಕ್ಕೆ ರಾಜ್ ಬಿ. ಶೆಟ್ಟಿಯವರ ಗಾಂಭೀರ್ಯ ಮತ್ತು ಭಾವನಾತ್ಮಕ ನಟನೆ ಸೂಕ್ತವಾಗಿದೆ.
ಇದನ್ನೂ ಓದಿ: ಮೋದಿಯವರ ಭೇಟಿಯಾದಾಗ ನನಗೆ ಅವರ AURA ಅನುಭವವಾಯಿತು !! ರಿಷಭ್ ಶೆಟ್ಟಿ; ವೈರಲ್ ಆದ ಹೇಳಿಕೆ
ಗುರುದತ್ತ ಗಾಣಿಗ ಕಾದಂಬರಿಯ ಮೂಲ ಸಾರವನ್ನು ಕಾಪಾಡಿಕೊಂಡು, ಆಧುನಿಕ ದೃಶ್ಯ ರೂಪಕ್ಕೆ ತಕ್ಕಂತೆ ಚಿತ್ರವನ್ನು ರೂಪಿಸುವ ಯೋಜನೆಯಲ್ಲಿದ್ದಾರೆ. ಚಿತ್ರೀಕರಣವು ಶೀಘ್ರದಲ್ಲೇ ಆರಂಭವಾಗುವ ಸಾಧ್ಯತೆಯಿದ್ದು, 2026 ಅಥವಾ 2027ರಲ್ಲಿ ಚಿತ್ರ ಬಿಡುಗಡೆಯಾಗಬಹುದು. ಮಲೆನಾಡಿನ ದೃಶ್ಯ ಸೌಂದರ್ಯವನ್ನು ಚಿತ್ರದಲ್ಲಿ ಕಟ್ಟಿಕೊಡುವುದು ಮತ್ತು ಕಾದಂಬರಿಯ ರೋಮಾಂಚಕ ತಿರುವುಗಳನ್ನು ಚಿತ್ರರೂಪಕ್ಕೆ ತರುವುದು ಚಿತ್ರತಂಡದ ಮುಖ್ಯ ಗುರಿಯಾಗಿದೆ.
ಜುಗಾರಿ ಕ್ರಾಸ್ ಚಿತ್ರವು ಕನ್ನಡ ಸಾಹಿತ್ಯ ಮತ್ತು ಚಿತ್ರರಂಗದ ನಡುವಿನ ಸೇತುವೆಯಾಗಲಿದೆ. ತೇಜಸ್ವಿಯವರ ಕಾದಂಬರಿಯ ಆಳವಾದ ಸಂದೇಶಗಳು, ಪರಿಸರ ಕಾಳಜಿಯೊಂದಿಗೆ ರೋಮಾಂಚಕ ಕಥೆಯನ್ನು ಒಡ್ಡುವ ಈ ಚಿತ್ರವು ಕನ್ನಡ ಚಿತ್ರರಂಗದಲ್ಲಿ ಹೊಸ ಅಲೆಯನ್ನು ಸೃಷ್ಟಿಸುವ ಸಾಧ್ಯತೆಯಿದೆ. ಸಾಹಿತ್ಯಾಸಕ್ತರು ಮತ್ತು ಚಿತ್ರಪ್ರೇಮಿಗಳಿಗೆ ಈ ಚಿತ್ರವು ಒಂದು ದೃಶ್ಯ ರಸದೌತಣವನ್ನು ಒಡ್ಡಲಿದೆ.
