ಎಲಾನ್ ಮಸ್ಕ್ ಸಂದರ್ಶನ : ಭವಿಷ್ಯದ ಜಗತ್ತು ಮತ್ತು ಮನುಕುಲದ ರೋಚಕ ದರ್ಶನ

ಖ್ಯಾತ ಉದ್ಯಮಿ ಮತ್ತು ಝೆರೋಧಾ (Zerodha) ಸಹ-ಸಂಸ್ಥಾಪಕರಾದ ನಿಖಿಲ್ ಕಾಮತ್ ಅವರು ಇತ್ತೀಚೆಗೆ ಜಗತ್ತಿನ ಅತ್ಯಂತ ಶ್ರೀಮಂತ ವ್ಯಕ್ತಿ ಮತ್ತು ಟೆಸ್ಲಾ, ಸ್ಪೇಸ್‌ಎಕ್ಸ್ ಮುಖ್ಯಸ್ಥರಾದ ಎಲಾನ್ ಮಸ್ಕ್ ಅವರನ್ನು ಸಂದರ್ಶಿಸಿದರು. ಈ ವಿಶೇಷ ಸಂದರ್ಶನವು ಭವಿಷ್ಯದ ತಂತ್ರಜ್ಞಾನ, ಕೃತಕ ಬುದ್ಧಿಮತ್ತೆ (AI), ಭಾರತದ ಪಾತ್ರ ಮತ್ತು ಜೀವನದ ತತ್ವಗಳ ಬಗ್ಗೆ ಆಳವಾದ ಚರ್ಚೆಗೆ ಸಾಕ್ಷಿಯಾಯಿತು. ಜಗತ್ತಿನ ಎರಡು ಪ್ರಭಾವಶಾಲಿ ವ್ಯಕ್ತಿಗಳಾದ ಎಲಾನ್ ಮಸ್ಕ್ ಮತ್ತು ನಿಖಿಲ್ ಕಾಮತ್ ಅವರ ನಡುವಿನ ಸಂಭಾಷಣೆ ಕೇವಲ ಉದ್ಯಮದ ಬಗ್ಗೆಯಲ್ಲ, ಬದಲಾಗಿ ಮನುಕುಲದ ಭವಿಷ್ಯದ ಬಗ್ಗೆಯಾಗಿತ್ತು. ಈ ಸಂದರ್ಶನದಲ್ಲಿ ಎಲಾನ್ ಮಸ್ಕ್ ಅವರು ತಂತ್ರಜ್ಞಾನ, ಕೃತಕ ಬುದ್ಧಿಮತ್ತೆ ಮತ್ತು ಭಾರತದ ಯುವಜನತೆಗೆ ನೀಡಿದ ಸಂದೇಶಗಳು ಕ್ರಾಂತಿಕಾರಿಯಾಗಿದ್ದವು.

ಎಲಾನ್ ಮಸ್ಕ್ ಮತ್ತು ನಿಖಿಲ್ ಕಾಮತ್ ಅವರ ಸಂದರ್ಶನದಲ್ಲಿ ಚರ್ಚೆಯಾದ ಕೆಲವು ಸ್ವಾರಸ್ಯಕರ ಮತ್ತು ಆಳವಾದ ವಿಚಾರಗಳು ಇಲ್ಲಿದೆ

ಕೆಲಸ ಮಾಡುವುದು ಐಚ್ಛಿಕವಾಗಲಿದೆಯೇ?
ಎಲಾನ್ ಮಸ್ಕ್ ಅವರ ಪ್ರಕಾರ, ಮುಂದಿನ 15 ರಿಂದ 20 ವರ್ಷಗಳಲ್ಲಿ ಕೃತಕ ಬುದ್ಧಿಮತ್ತೆ (AI) ಮತ್ತು ರೋಬೋಟಿಕ್ಸ್ ತಂತ್ರಜ್ಞಾನವು ಎಷ್ಟರಮಟ್ಟಿಗೆ ಮುಂದುವರಿಯಲಿದೆ ಎಂದರೆ, ಮನುಷ್ಯರು ಕೆಲಸ ಮಾಡುವುದು ಅನಿವಾರ್ಯವಾಗಿರುವುದಿಲ್ಲ. ಅದು ಕೇವಲ ಹವ್ಯಾಸಕ್ಕಾಗಿ ಮಾತ್ರ ಸೀಮಿತವಾಗಬಹುದು. ಭವಿಷ್ಯದಲ್ಲಿ ನಮಗೆ ಅಗತ್ಯವಿರುವ ಎಲ್ಲ ಸರಕು ಮತ್ತು ಸೇವೆಗಳನ್ನು ಯಂತ್ರಗಳೇ ಒದಗಿಸಲಿವೆ. ಇದರಿಂದಾಗಿ ಜಗತ್ತು “ಸಾರ್ವತ್ರಿಕ ಮೂಲ ಆದಾಯ”ದ (Universal Basic Income) ಬದಲು “ಸಾರ್ವತ್ರಿಕ ಉನ್ನತ ಆದಾಯ”ದ (Universal High Income) ಹಂತಕ್ಕೆ ತಲುಪಲಿದೆ ಎಂದು ಮಸ್ಕ್ ಭವಿಷ್ಯ ನುಡಿದಿದ್ದಾರೆ.

ಭಾರತ ಮತ್ತು ಸ್ಟಾರ್‌ಲಿಂಕ್ (Starlink)
ಭಾರತದ ಬಗ್ಗೆ ಅಪಾರ ಮೆಚ್ಚುಗೆ ವ್ಯಕ್ತಪಡಿಸಿದ ಮಸ್ಕ್, ಅಮೆರಿಕದ ಪ್ರಗತಿಯಲ್ಲಿ ಭಾರತೀಯ ಮೂಲದ ಪ್ರತಿಭಾವಂತರ ಪಾತ್ರ ದೊಡ್ಡದಿದೆ ಎಂದು ಹೇಳಿದರು. ಇದೇ ವೇಳೆ, ತಮ್ಮ ‘ಸ್ಟಾರ್‌ಲಿಂಕ್’ ಯೋಜನೆಯನ್ನು ಭಾರತಕ್ಕೆ ತರುವ ಇಂಗಿತವನ್ನು ವ್ಯಕ್ತಪಡಿಸಿದರು. ಹಳ್ಳಿಗಳು ಮತ್ತು ದುರ್ಗಮ ಪ್ರದೇಶಗಳಲ್ಲಿ ವೇಗವಾದ ಇಂಟರ್ನೆಟ್ ಸಂಪರ್ಕವನ್ನು ಒದಗಿಸಲು ಸ್ಟಾರ್‌ಲಿಂಕ್ ಉಪಗ್ರಹಗಳು ಅತ್ಯಂತ ಸಹಕಾರಿಯಾಗಲಿವೆ ಎಂದು ಅವರು ಅಭಿಪ್ರಾಯಪಟ್ಟರು.

ಹಣದ ಮೌಲ್ಯ ಕಳೆದುಹೋಗಬಹುದು
ಎಲಾನ್ ಮಸ್ಕ್ ಅವರ ಪ್ರಕಾರ, ಭವಿಷ್ಯದಲ್ಲಿ ಕೃತಕ ಬುದ್ಧಿಮತ್ತೆ (AI) ಮತ್ತು ರೋಬೋಟ್‌ಗಳು ಎಲ್ಲಾ ಕೆಲಸಗಳನ್ನು ಮಾಡಿದರೆ, ಮನುಷ್ಯರ ಕೆಲಸದ ಅಗತ್ಯವಿರುವುದಿಲ್ಲ. ಆಗ ಸರಕು ಮತ್ತು ಸೇವೆಗಳ ಉತ್ಪಾದನಾ ವೆಚ್ಚ ಶೂನ್ಯಕ್ಕೆ ಇಳಿಯುತ್ತದೆ. ಈ ಸನ್ನಿವೇಶದಲ್ಲಿ ಸದ್ಯದ ಹಣಕಾಸು ವ್ಯವಸ್ಥೆಯು ಅಪ್ರಸ್ತುತವಾಗಬಹುದು. ಬದಲಿಗೆ, “ಶಕ್ತಿ” (Energy) ಮತ್ತು ಕಂಪ್ಯೂಟರ್‌ಗಳ “ಕಂಪ್ಯೂಟ್ ಪವರ್” (Compute Power) ಭವಿಷ್ಯದ ಹೊಸ ಕರೆನ್ಸಿಯಾಗಲಿದೆ ಎಂದು ಮಸ್ಕ್ ಊಹಿಸಿದ್ದಾರೆ.

ಕಾಲೇಜು ಕೇವಲ ಮಜಾ ಮಾಡಲಷ್ಟೇ!
ಇಂದಿನ ದಿನಗಳಲ್ಲಿ ಮಾಹಿತಿ ಮತ್ತು ಜ್ಞಾನ ಉಚಿತವಾಗಿ ಇಂಟರ್ನೆಟ್‌ನಲ್ಲಿ ಸಿಗುವುದರಿಂದ, ಕೇವಲ ಕಲಿಯಲು ಕಾಲೇಜಿಗೆ ಹೋಗುವ ಅಗತ್ಯವಿಲ್ಲ ಎಂದು ಮಸ್ಕ್ ಅಭಿಪ್ರಾಯಪಟ್ಟರು. ಕಾಲೇಜು ಎಂಬುದು ಸ್ನೇಹಿತರನ್ನು ಭೇಟಿ ಮಾಡಲು, ಸಾಮಾಜಿಕವಾಗಿ ಬೆರೆಯಲು ಮತ್ತು ಶಿಸ್ತು ಕಲಿಯಲು ಮಾತ್ರ ಸೀಮಿತವಾಗಬೇಕು. ಪದವಿಗಿಂತ ಕೌಶಲ್ಯ ಮುಖ್ಯ ಎಂಬುದು ಅವರ ಸಂದೇಶ.

ಗೆದ್ದವರನ್ನು ದ್ವೇಷಿಸುವ ಪ್ರವೃತ್ತಿ
ಜನಸಾಮಾನ್ಯರು ಯಾವಾಗಲೂ ಸೋಲುತ್ತಿರುವವರನ್ನು ಅಥವಾ ಚಿಕ್ಕವರನ್ನು (Underdog) ಬೆಂಬಲಿಸುತ್ತಾರೆ ಮತ್ತು ಗೆದ್ದವರನ್ನು (Winners) ಟೀಕಿಸುತ್ತಾರೆ. ಟೆಸ್ಲಾ ಕಂಪನಿ ಚಿಕ್ಕದಾಗಿದ್ದಾಗ ಜನ ಅದನ್ನು ಇಷ್ಟಪಡುತ್ತಿದ್ದರು, ಆದರೆ ಈಗ ಅದು ಯಶಸ್ವಿಯಾದ ಮೇಲೆ ಟೀಕೆಗಳು ಹೆಚ್ಚಾಗಿವೆ. “ನೀವು ಚಿಕ್ಕವರಾಗಿದ್ದಾಗ ಜನ ನಿಮ್ಮನ್ನು ಪ್ರೀತಿಸುತ್ತಾರೆ, ಆದರೆ ದೊಡ್ಡವರಾದಾಗ ದ್ವೇಷಿಸುತ್ತಾರೆ” ಎಂದು ಮಸ್ಕ್ ಬೇಸರ ವ್ಯಕ್ತಪಡಿಸಿದರು.

ಯುವ ಉದ್ಯಮಿಗಳಿಗೆ ಕಿವಿಮಾತು
ಭಾರತದ ಯುವ ಉದ್ಯಮಿಗಳಿಗೆ ಮಸ್ಕ್ ನೀಡಿದ ಸಲಹೆ ಅತ್ಯಂತ ಸರಳ ಮತ್ತು ಶಕ್ತಿಯುತವಾಗಿತ್ತು: “ನೀವು ಸಮಾಜದಿಂದ ಪಡೆಯುವುದಕ್ಕಿಂತ ಹೆಚ್ಚಿನದನ್ನು ಸಮಾಜಕ್ಕೆ ಹಿಂತಿರುಗಿಸಿ (Make more than you take).” ಹಣದ ಬೆನ್ನಹ ಹಿಂದೆ ಬೀಳುವ ಬದಲು, ಜನರಿಗೆ ಉಪಯೋಗವಾಗುವಂತಹ ಉತ್ಪನ್ನಗಳನ್ನು ಮತ್ತು ಸೇವೆಗಳನ್ನು ಸೃಷ್ಟಿಸಿದರೆ ಯಶಸ್ಸು ತನ್ನಷ್ಟಕ್ಕೆ ತಾನೇ ಅರಸಿ ಬರುತ್ತದೆ ಎಂದು ಅವರು ಹೇಳಿದರು.

ಒಟ್ಟಾರೆಯಾಗಿ, ಈ ಸಂದರ್ಶನವು ತಂತ್ರಜ್ಞಾನವು ನಮ್ಮ ಬದುಕನ್ನು ಹೇಗೆ ಬದಲಾಯಿಸಲಿದೆ ಮತ್ತು ನಾವು ಅದಕ್ಕೆ ಹೇಗೆ ಸಿದ್ಧರಾಗಬೇಕು ಎಂಬುದರ ಕುರಿತು ಎಲಾನ್ ಮಸ್ಕ್ ಅವರ ದೂರದೃಷ್ಟಿಯನ್ನು ಅನಾವರಣಗೊಳಿಸಿತು.

ಎಲಾನ್ ಮಸ್ಕ್ ಮತ್ತು ನಿಖಿಲ್ ಕಾಮತ್ ಅವರ ಪೂರ್ತಿ ವೀಡಿಯೋ